KOUT PITIT an Ayiti : Yon verite kache ki ap ravaje fanmi ak relasyon sosyal yo

- Pubilcité-

Nan sosyete ayisyen an, genyen plizyè pwoblèm sosyal nou souvan evite pale de yo, swa pa wont, swa pa laperèz, swa paske yo twò sansib. Youn ladan yo se fenomèn yo rele “kout pitit”, yon sitiyasyon kote yon fi fè yon gason kwè li se papa yon timoun pandan an reyalite li pa papa biyolojik la. Malgre sijè a delika, reyalite a montre li ap pran plis plas chak jou e li pote gwo konsekans sou fanmi, relasyon, ak estabilite sosyal.

Kisa « kout pitit » ye vrèman?

Nan sans senp, kout pitit rive lè patènite yon timoun pa koresponn ak verite biyolojik la. Sa kapab fèt volontèman, lè yon fi konnen kiyès papa a ye men li chwazi bay yon lòt gason responsabilite a. Gen lòt ka kote sitiyasyon an pi konplike. Dapre temwayaj plizyè fanm, gen fwa yo fè relasyon ak plis pase yon patnè nan menm peryòd la, sa ki fè yo pa fin sèten kiyès ki papa timoun nan.

Syans menm montre yon fenomèn ki ra men posib : superfekondasyon eteropatènel, kote yon fanm ka ansent pou de gason diferan nan menm sik règ la, e sa ka lakòz li fè marasa ki pa gen menm papa biyolojik. Menmsi ka sa yo pa souvan, yo egziste e yo konfime kestyon patènite a pa toujou senp.

Temwayaj ki fè reflechi

Plizyè gason ki sibi sitiyasyon sa a fè konnen yo santi yo twonpe, imilye, e pafwa kraze sikolojikman. Gen ladan yo ki kontinye okipe timoun nan malgre yo konnen se pa pitit pa yo, swa pou lanmou, swa pou evite eskandal sosyal. Gen lòt ki abandone timoun nan nèt lè yo dekouvri laverite, sa ki lakoz timoun nan grandi san sipò papa.

Gen fi tou ki viv ak yon sekrè yo pa janm revele. Kèk konnen byen kiyès papa a ye men yo pè di laverite paske sa ka kraze relasyon yo oswa maryaj yo. Gen lòt k ap viv ak dout la san yo pa janm chèche fè tès ADN. Selon kèk gason, genyen fi ki menm refize tès ADN paske yo pa vle verite a parèt.

Konsekans sou fanmi ak sosyete

Kout pitit pa sèlman yon kestyon prive ant de moun. Li gen enpak dirèk sou:

• estabilite fanmi yo

• konfyans ant mari ak madanm

• devlopman emosyonèl timoun yo

• sekirite sosyal

Gen ka kote konfli sou kestyon patènite mennen nan vyolans grav, menm lanmò. Gen timoun ki viktim neglijans oswa rejè. Gen relasyon ki kraze, maryaj ki fini, fanmi ki divize.

Lè konfyans disparèt nan mitan koup yo, sosyete a menm vin pi frajil. Si yon gason pa sèten si pitit li se pou li, sa ka fè li pè pran responsabilite fanmi. Sa kreye plis timoun san sipò, plis manman selibatè, e plis dezòd sosyal.

Yon sijè nou dwe sispann kache

Anpil moun fèmen je sou kestyon sa a, men kèk obsèvatè sosyal estime prèske 30% fanm ap viv ak yon dout sou patènite omwen yon timoun. Menmsi chif sa a mande plis rechèch syantifik pou konfime li, li montre dimansyon pwoblèm nan ka pi gwo pase nou panse.

Silans pa rezoud anyen. Okontrè, li fè blesi yo vin pi fon.

Ki solisyon ki posib?

Pou limite fenomèn sa a, plizyè aksyon enpòtan:

• plis edikasyon seksyèl ak responsablite afektif

• dyalòg ouvè nan koup yo

• ankouraje verite ak transparans

• aksè fasil ak tès ADN lè gen dout

• sipò sikolojik pou fanmi ki afekte

Respè pou laverite se premye etap pou pwoteje timoun yo, ki se pi gwo viktim nan sitiyasyon sa yo.

Kout pitit se pa sèlman yon kestyon moral oswa entim. Se yon kesyon sosyal ki touche diyite, konfyans ak avni jenerasyon k ap grandi yo. Pou sosyete ayisyen an vanse, li enpòtan pou nou pale de sijè difisil sa yo san prejije, ak plis konsyans ak responsablite.

Paske nan fen istwa an, se pa granmoun yo sèlman ki soufri… se timoun yo ki peye pi gwo pri a.

- Publicité -